نشيد بدأت وباسم الله

• بدأت وباسم الله ذخري وعزتي
• جليل(ن) ولا يُدعى سواهُ جليل
• وثنّيت بالحمد الجزيل موردّاً
• لربي على فضله وجود فضيل
• واصلّي على من يرتجون شفاعته
• أبو قبة(ن) خضراء ووجه جميل
• ونستمنح الله الجواد نوالهُ
• يهنّي ويسقينا بنفح السيل
• ويفرغ علينا الصبر في كل حالة(ن)
• كما افرغ على ابراهيم واسماعيل
• ويا من بفضله يوم نزّل على الرسل
• ويرسل بسوق الوحي جبرائيل
• ويا من بفضله يوم نزّل على الرسل
• ويرسل بقبض الروح عزرائيل
• ويا من جميع الناس يرجون رحمته
• ويرسل بسوق الغيث ميكائيل
• ويا من جميع الناس يخشون سطوته
• ويرسل بنفخ الصور إسرافيل
• دعيناك تغفر كل ذنبي وزلّتي
• إذا امسيت وحدي يا قويّ الحيل
• ألا يا غراب البين فرّقت بيننا
• تجلّيت وانا ما قتلت قتيل
• ألا يا غراب البين فرّقت بيننا
• تجلّيت وانا ما قطعت سبيل
• فيا وجد روحي من فراق قبيلتي
• قبيلة وتعرف قدر كل قبيل
• ويا وجد روحي من فراق أحبتي
• خصوص الذي سمّي على اسمي ويل
• أنا لازم اوصّيك منّي وصية(ن)
• إذا ما نكحت انكح نجاب الخيل
• ولا تنكح الشوعاء ولو راع زينها
• يديها قصيرة واللسان طويل
• ترى (ف)الرجال اجناس فيهم كما الجمل
• صبور(ن) على حمله وفيه الميل
• وفيهم مثيل الثور يا كبر نوحته
• يبحث على قرنه سنامه ميل
• وفيهم مثيل النمر يا جور لطمته
• يخلّي المسامع والنخاع هليل
• وفيهم مثيل الديك اذا ما احتملت به
• يقشّب لباسك وانت فيه تشيل
• لن قدت ما ينقاد وان سقت ما مشى
• ويبحث برجله كأنها الزنبيل
• تراييت وانا راقد(ن) فانّي انتبه
• وقمت اتهمهم في ظلام الليل
• غلام(ن) يقل لي غيّر الفال بالغداء
• وعف من مخوّة قال قال وقيل
• ترى الارض مثل الارض باللين والقسا
• ولو فاتك خليل(ن) لقيت خليل
• فيا كم غنيّ(ن) يتحزّم بمذهبه
• وعوّد فقير(ن) يحتزم بفتيل
• وكم زارع(ن) كانت بلاده تبرّعه
• وعوّد يزكّيها بدون حصيل
• وكم هامة(ن) يهرج وهو ولد هامة(ن)
• وكم أسد لجّم وراح ذليل
• فيا صفة البهتان شبّهت فعلهم
• كما فعل (ف)الساقة بنو اسرائيل
• غدون على اصنام(ن) وهم يعبدونها
• وحن راح موسى يعبدون حسيل
• فيا ليت لي جهد ارتحل عن ديارهم
• يمن واتعدّى حاشد(ن) وبكيل
• فلو كان مخلوق(ن) يدوم له البقاء
• لكان رسول الله بالتنزيل
• عليه صلاة الله ما هبّت الصبا
• وما راح له زاير بقلب عليل