محاورة القيف بعيون(ن) ترامق لك

البدع (الجد عبدالله بن شائق, غفر الله له):

• يا شائق القيف بعيون(ن) ترامق لك
• ودّي تهرّج مع اهل سنان وهلالي
• وبعد ذا الليل ملّ الهيض ملـّـيته

الرد:

• أي ودّي اساعدك ماذا ترى مقلك
• من هاجس(ن) مثل طعم التمر وهلالي
• وانّ انت خذت الذهب والجيب ملـّـيته

البدع (الجد عبدالله بن شائق, غفر الله له):

• هذا الهلالي وصل لاعندنا واشراك
• يا مرحبا بالحليف الطيـّـب الغالي
• على المودّة يلاقيني ولاقيته

الرد:

• يا زين خلـّـلك مع من قدّرك وشراك
• أنا اشهد انّ الزمرّد والذهب غالي
• ما غشـّـني تاجره بيدي تنقـّـيته

البدع (الجد عبدالله بن شائق, غفر الله له):

• يا شائق القيف بعيون(ن) ترامق لك
• ودّي تهرّج مع اهل سنان وهلالي
• وبعد ذا الليل ملّ الهيض ملـّـيته

الرد:

• أي ودّي اساعدك ماذا ترى مقلك
• من هاجس(ن) مثل طعم التمر وهلالي
• وانّ انت خذت الذهب والجيب ملـّـيته

البدع (الجد عبدالله بن شائق, غفر الله له):

• يا شائق ارجيك (ف) الشيمة وشي مثلك
• عيب(ن) على الولـْـد لا منـّـه تعدّاني
• أرجيه في ليلة البارح كم ارجيته

الرد:

• حدّيتني (ع)الحكم ما كأن شيء مثلك
• يا ليت تسمح لولـْـدك ينتع الداني
• قدّام يأخذ مع الجاوه كمر جيته

البدع (الجد عبدالله بن شائق, غفر الله له):

• يا شائق الليلة, الليلة سوى قتلك
• لاجل ايش سافر من الديرة وخلّاني
• ويوم جاني ذبحت الكبش واقريته

الرد:

• ودّي بسيـّـارة(ن) وامـّـا السواقة لك
• عساني أركـّـب أصحابي وخلّاني
• وابشـّـرك قد فهمت العلم وقريته

البدع (الجد عبدالله بن شائق, غفر الله له):

• وشن نبيـّـك وما دينك ومن ربـّـك
• وهل تصلـّـي وصمتم حدّ رمـْـضاني
• والا يماريك شيطانك وماريته

الرد:

• يا تمر منك الدواء والقوت من رُبـّـك
• أحسن من البـُـرّ والا حـُـدّر امضاني
• واحلف لكم ما بعد ذقته ولا ريته

البدع (الجد عبدالله بن شائق, غفر الله له):

• لا تنظر إلى السماء وانظر لما قدرك
• ما كـُـلّ من يركب البابور رُبـّـاني
• والجمر ما ينطفي من يوم شبـّـيته

الرد:

• أنا اشهد انّ القبيلة قوّموا قدرك
• يا من يعلـّـمني الحكمة وربـّـاني
• ما اخالف اوامره من يوم شبـّـيته

البدع (الجد عبدالله بن شائق, غفر الله له):

• احفظ علوم العرب واحفظ علام اهلك
• ولا تضيـّـع حقوق الجار والعاني
• والعاني اصبر ورح له يوم عانيته

الرد:

• لا تكثـّـر اللوم وترفـّـق على مهلك
• القلب متولـّـع(ن) والروح ولعاني
• أعاني الهم, ومنك الظلم عانيته

البدع (الجد عبدالله بن شائق, غفر الله له):

• فارقت ربعك وفارقت البلد واهلك
• وهبت في دربي أنا وانت حدّاني
• ما جيت (م)الدرب ذا يصلح وانا جيته

الرد:

• والله لو اموت من دون الغضي واهلك
• يا والدي لاتحدّى من تحدّاني
• هذا ضميري يناجيني وناجيته

البدع (الجد عبدالله بن شائق, غفر الله له):

• يا ذا رفعت الكواكب فوقنا وسـْـمـَـاك
• والارض سخـّـرتها للانس والجاني
• تهدي غلام(ن) عصاني يوم ربـّـيته

الرد:

• تركتني بين حيتان البحر واسماك
• والارض فيها العنب واللوز والجاني
• يجنيْ التمر ليت بيتي من وراء بيته

البدع (الجد عبدالله بن شائق, غفر الله له):

• يا مرحبا بالهلالي والذي شارك
• في حفلنا والذي مقبل وريحاني
• حساب جرى سيله هبابيده

الرد:

• انظر في الصفّ الايمن والذي شارك
• وانظر لذا غرزته برك(ن) وريحاني
• رشرش على الصدر والساعة هباب ايده

البدع (الجد عبدالله بن شائق, غفر الله له):

• ودّي تخلـّـي غرورك وانت وش ودّك
• قدّام ما كنت تحرز عشر (م)الضاني
• واليوم وش ريت فيما قلت وش ريته

الرد:

• والله لو اشوى العصى والضرب واشوى الدكّ
• يا من خذ المال وعلى العـُـشر مضـّـاني
• لاقـُـلـّـه اسكت عن المهجوس وشريته

البدع (الجد عبدالله بن شائق, غفر الله له):

• مهما قريت الكتب لا زلت في جهلك
• أخفيت شيء(ن) على ربعك وشيء باني
• وكأني اهرج مع جنـّـي ولاجيته

الرد:

• الكـُـلّ (ف) اللعب يا ابويه توجـّـه لك
• صغير وكبيرهم جاهل وشيباني
• كـُـلّ(ن) يقل لو تكن غائب ولا جيته

البدع (الجد عبدالله بن شائق, غفر الله له):

• تركت علمي ولا تسمع علام اهلك
• واعـْـلمك دايم ولا مرّة علمتاني
• شائق على جدّه المرحوم سمـّـيته

الرد:

• هوّن علينا ولا تزعل على مهلك
• ضيـّـقني ابو جعود(ن) من على امتاني
• تعـّـبت قلبي على ما به وسمـّـيته

البدع (الجد عبدالله بن شائق, غفر الله له):

• قدّام وانا بعد مثلك وفي كبرك
• ما قلت ودّي تهدّ الحصن يا باني
• أبني مع من بنى جدره وعلـّـيته

الرد:

• الله يبارك في اولادك وفيك ابرك
• ما خذت علمي من امريكي وياباني
• أقول قولي مية مرّة وعلـّـيته

البدع (الجد عبدالله بن شائق, غفر الله له):

• نظرت مـُـهرة صبوح(ن) فوقها وسمك
• ما قادها جاهل(ن) والا وريعاني
• ليت الصبا يشترى, ليته ألا ليته

الرد:

• تقديركم عالي(ن) عند العرب واسمك
• وحبـّـكم زايد(ن) عندي وريعاني
• في ضلـّـكم زعت في صوتي ولاليته

البدع (الجد عبدالله بن شائق, غفر الله له):

• يا ليت نرتاح من عندي ومن عندك
• قلبي يعاني من العلـّـة ومرضاني
• كأنك من الهند وانا من قـُـرى ريده

الرد:

• ترى الخطأ كان من عندي ومن عندك
• وكل ما صار سبع ايمان ما ارضاني
• مصيبة الشخص تاجي من قرار ايده

البدع (الجد عبدالله بن شائق, غفر الله له):

• فيما مضى يوم انا وارد في عمرك
• كنت اعلم ذا قاصي(ن) (م)الناس والدّاني
• واليوم كـُـلّ(ن) سمعني وانته آبيته

الرد:

• أسمعك يا والدي دايم واطيع امرك
• ترى نصيبي لهذا الحفل ودّاني
• ولدك بنى قصر عالي وانتهى بيته

البدع (الجد عبدالله بن شائق, غفر الله له):

• يا شائق اتعبتني ما ادري وش آهب لك
• أعطيتك اللوز والمشمش ورمـّـاني
• واذا تريد البلح رح للحساء سيده

الرد:

• من صدّق اهل النميمة والوشاه ابلك
• يرمي سمومه على اصحابه ورمـّـاني
• والزين مظلوم يا ما اكثر حساسيده

البدع (الجد عبدالله بن شائق, غفر الله له):

• يا ناوي(ن) حثّ له سيل(ن) وراعد لك
• يسوق في وادي الحفياء وشرواني
• واليوم وش ريت فيما قلت وش ريته

الرد:

• ظلمت واشتدّ ظلمك من وراء عدلك
• من بعد ذاك الضما ما ادري وش ارواني
• تقدر تعذر في المهجوس وشريته؟