نشيد يا واحد

• يا واحد(ن) معبود عالم بالاحوال
• ترحم حزين القلب والطف بحاله
• ذا ما نشد في طول عمره ولا سال
• إلا عن المحبوب دايم سؤاله
• قلبه حزين(ن) في حياته ولا زال
• يشكي من اللي ساعي(ن) في زواله
• أثر الهوى جاير كما حمل الاثقال
• يا ويل من قلبه بلي به وشاله
• والحب مثل السيّمة بيد دلّال
• كل(ن) يجي يبغى عليها دلالة
• ومن بلي به ضيّع الدال بالذال
• وان قام يمشي مثل شيبة هلالة
• فكم غني(ن) كان يزهي له المال
• قلبه بلي بالحب وانساه ماله
• ذا قيمته قرشين يشري به بريال
• يضيّعه ما كان ماله حلاله
• يا صاحبي باشوف عندك تبهلال
• مثل الذي عنده عليّه وكالة
• لن كان ما لك شفّ خل التحيّال
• فكم عزيز(ن) راح واخذ بداله
• يشهد على ما قلت لي شهر شوال
• في ليلة النص يتلألأ هلاله
• لكنّ جانا الصبح والليل ما طال
• ثم افترقنا راح كل(ن) لحاله
• فجيتني يا قرة العين (ف)الحال
• تشكي من اللي صاب قلبك وجاء له
• قلت اصبر انّ الصبر من طيب الاعمال
• لا بدّ راع الصبر يرتاح باله
• فرحت من عندي حزين(ن) وزعال 
• تقول متكبـّر وماله زهى له
• لا انا بمتكبر ولا انا بزلال
• انا من اهل العز واهل الشكالة
• انا عريب الجد والعم والخال
• لا قام كل(ن) يتباها بخاله
• ما انا كما واحد غشيم(ن) وجمّال
• لا راحوا اهل المال سرّح جماله
• وان سأْلتني عن ديرتي يا رضى البال
• أنا من النهيين وادي حوالة
• أنا ابن من يوفي بقوله اذا قال
• واذا هرج كل(ن) يلبّي مقاله
• قال انتبه يا ولد انْ كنت رجّال
• فلا تضيّع قالتك والرجالة
• ولا تصاحب راعي القيل والقال
• لو شاف عيب(ن) فيك خبّر وقاله
• وكل من يمشي مع القوم الانذال 
• لا بدّ يتعلّم فنون النذالة
• والناس فيهم خيّرينا وجهّال
• والحُرّ ما يمشي مع اهل الجهالة
• وبعضهم تلقى تراحيب واسهال
• واذا نصاه الضيف يلقى قباله
• مثل النمر تسمع لصوته تزهلال
• يقدّر الضيفان والبيض فاله
• والبعض مثل الصقر في جوّ الاهوال
• لا طاب له صيد(ن) وشافه هوى له
• وبعضهم يصلح في السوق حمّال
• قشّه على ظهره ويأخذ حماله
• يا ونتي ونة سجين(ن) بسلسال
• يبات يتندّم على ما جرى له
• ساعة دخل للسجن واجه ترزّال
• ما قدّروه اهل الردى والرزالة
• يا صاحبي لو تهت في بحر الاهوال
• أنا معك تايه ورب الجلالة
• ولو بديت السر في بعض الاحوال
• فانت السبب يا زين هاوي دلاله
• لكنّ كل(ن) تاه في بحر الاهوال
• ما صادوا المعنى عيال الفلالة
• يا صاحبي بسّ ان عندي سعة بال
• واصبر على صاب قلبي وجاء له
• أنا معي قلب(ن) كما طير حلحال
• ذا سيّب الروضة وفارق تبالة
• لك صاحب(ن) والنوم من عينه انجال
• غدا عن الراحة وفارق عياله
• شائق يقل ذقت المُر الوان واشكال
• والقلب حن يذكر حبيبه بكى له
• يا ذا خلقت آدم وحوّاء والانجال
• والارض واللي فوقها والسماء له
• تغفر ذنوبي يوم لا اهل(ن) ولا مال
• ولا احد(ن) غيرك قوي ينشكى له
• وارضى اللهم (ع)النبيّين والآل
• وكل مسلم مؤمن(ن) بالرسالة