البدع:
- يا ابو جميل افتني في وقتنا وش معك فيه
- تغيـّـرت حالة العربان بين امس واليوم
- وتقدّم الشعب كـُـله ما عاد الا انت وانا
- ساقي تعب يا رفيقي وانثنى وش معكفيه؟
- سبحان من فرّق العربان حين امسوا ليوم
- من يجتهد ما يضيـّـع رزقه إلا ان توانا
- قدّام جسمي بخير وكان ربي مشافيه
- واليوم تتعبني الجلسة ويتعبني القوم
- وان صحت ما احد يجاوبني وكأني مسى انا
- يا والدي شف طريق الحق واللي مشى فيه
- الله يجيرك من العلـّـة ومن دقـّـة القوم
- دقـّـات قلبي على فرقاك كالنيمسانا
- لي صاحب(ن) ما معي صاحب مثيله مساويه
- أدور حوله وهو حولي كما الطير ونحوم
- خجول وانا مثيله ما فقدنا مزانا
- أغض طرفي ولا ودّي نبيـّن مساويه
- أعطيته السمن فوق الزاد والشحم ولحوم
- ضيـّع جميلي وانا في ظنـّـي العلم زانا
- شرّق وغرّب وجنـّـب واقترب من شماليه
- بين السماوات والدنيا وتحت الثرى هوم
- يا صاحب العقل وانظر في بديع القرانا
- ما عاد يعرف يمينه صاحبي من شماليه
- من بعد ما كان يعلمني بما صار ولهوم
- ضيـّع طريقه وضيـّـعنا وضيـّـع قرانا
- اذا دخلت المعارك فالعدو لا تدرايه
- كرّ(ن) وفرّ(ن) و(ف)الميدان بالسيف وهجوم
- واثبت في المعركة لو فرّ منها جبانا
- تسال ماذا مع راع الغنم وانت داريه
- والضأن ما عندها ما تأكله والبل هجوم
- من كان في خاطره علم(ن) ومنهاج بانا
- من كان زعلان هب يدّي بيدّه واراضيه
- واسلم وسلـّم من اهل القيل والقال واللوم
- ذولا يقولوا لي أما اشكيه والا شكانا
- ليته يسافر معي ونفارق أرضي واراضيه
- ونفارق الحرث والثيران والدمس واللوم
- وكان من رفقة الحسـّـاد واللاش كانا
- سلام منـّـي على ذا حاضره مثل ماضيه
- ضيفه يحصل تراحيب(ن) وتقدير ونعوم
- وإذا سمع صائح(ن) يفزع ويحمي حمانا
- درب الخطر ما ربح من سار حوله وماضيه
- والبحر ما اريد نسبح في شواطيه ونعوم
- ريت المراكب وهي تغرق وربي حمانا
- أشوف واحد تسيوق, سوقنا ما ربح فيه
- يزعل من المشتري ويخاف من فارق السوم
- غشـّـاش وإذا غفلنا باعنا واشترانا
- ناس(ن) مثيل القمر والبعض ما ينـْـلمح فيه
- جمال يعطيه ربي من يحبـّـه ومرسوم
- والبندقه لو تصيب اللحم والمش ترانى
- يا كم لي اسال عنكم وانت ما عاد تسل ليه؟
- لا انته بميـّـت مع من مات ونقول مرحوم
- ولا أنت حيّ(ن) ونرمي كـُـلـّـنا من رمانا
- الطفل يبكي ويزعل منك لنْ ما تسليـّـه
- والأم تسهر معه وابوه ضايق ومزحوم
- مرارة العيش تسقينا من المـُـرّ مانا
- عذب اللمى يوم غنى ودّي اسمع لياليه
- يا كم سهرنا على ذا الصوت ونقيصر الرَوم
- والخيل ترقص معه ما هي بعجف(ن), سمانا
- جيش العرب زانت ايامه وزانت لياليه
- كسرى وفارس هزمناهم مع قيصر الروم
- والعز فوق ارضنا والنصر فوقه سمانا
- الليل فيه الكواكب زاهية والقمر فيه
- أنوارها تتلألأ فوقنا دائم الدوم
- نور(ن) على نور ما تقواه لا انته ولا انا
- من يشرب الليم والليمون ما يلقى مـُـرّْ فيه
- الهجر طعمه كما الحنظل وأنا داي (م)الدوم
- واليوم بعد الجفا والصدّ لنته ولانا
- يا لله يا ذا جميع امورنا منه واليه
- تغفر ذنوبي وترحمني فانا غير معصوم
- وعند رضوان هبني في فسيح الجنانا
- الموت حقاً ولا احد سالم(ن) من هويليه
- صلـّـوا وزكـّـوا وحجـّـوا يا هل الدين والصوم
- وخلـّـوا السحر يا اهل الشعوذة والجنانا
- يا ذا تحب العسل خذ من رحيقه وصافيه
- فيه الدواء والشفاء من كل علّات وسموم
- رحيق مختوم, بلسم للقلوب الحزانا
- ليته يصافيني اللي في تهامة واصافيه
- ياجي ويترك ديار(ن) كلـّـها حر وسموم
- حلـّـوا في التهم وانا عايش(ن) (ف)الحز انا
- أنا مع العامري بديار لابي ولابيه
- حدّي غليلة وحدّ الفرع نحميه (م) القوم
- والعامري حدّه الروزة وحدّه سنانا
- اللاش يعقب ويخسى لا يبيني ولا ابيه
- يهرب من الواجبات إذا دعيناه ويقوم
- جعله برمح(ن) وذاك الرمح حدّه سنانا
- يا ابو ثمان(ن) تلألأ نورها بين نابيه
- أبوه وانعم وجدّه نعرفه منْ رؤوس قوم
- له منزلة عالية عندي في أعلى مكانا
- سلوه يا ناس وشبه ما يبيني وأنا أبيه
- خلّا حياتي جحيم(ن) كـُـلـّـها مـُـرّ وسقوم
- يا ذا نقلت الخبر عنـّـي والاعلام كانا
- أمسى ضميري يناجيني برقـّـه واناجيه
- أشكال متحرّكة فيها مراسيم وعلوم
- في الليل نحلم وعند الصبح ما شيء معانا
- قدام في ما مضى ياجي صديقي وأنا آجيه
- والدار يا صاحبي فيها مراسيم وعلوم
- قلوبنا صافية والحظ ماشي معانا
- ياما تعبنا من الماضي ويا ما نعانيه
- والعدل مفقود بين الناس ظالم ومظلوم
- احكم بعدلك وخـَـلّ الظلم يا امير كانا
- ولد الردي ما يناسبني ولا ابغى نعانيه
- ماعيني اسري معه والليل ظالم ومظلوم
- غلطان تسري مع الاحباش يا اميركانا
- اهلين ياذا مثيل العين والقلب يابيه
- في منزل اهل الكرم والجود ترحيب وسلوم
- بنّ(ن) وهيل(ن) وماي الورد والزعفرانا
- توعد وتخلف وتقلب علمنا قلب يا بيه
- وهبت في دربنا طلعة ونزلات وسلوم
- يا ساهر الليل في ذا البر وزّع فرانا
- وصلت قصر الوزير ابغي نقابل معاليه
- شفت الحرس نايمة يا أحمد وانا جاني النوم
- واليوم ولـّى وضاع الوقت والليل جانا
- تفرّقوا ربعنا ما عاد يمشوا معا, ليه؟
- ما يقطفون العنب ويرافقوا جاني النوم
- تعبت واتعبتني وأتعبني الليلجانا
- عيـّـوا من اكل البصل ما يدروا انّ الدواء فيه
- مع انّ من ياكله في كل وجبة واكل ثوم
- سليم جسمه من العلّات والنصر حانا
- بيتي من البرد يدفيني وما احسن دوافيه
- على فراش الهناء واسمع لصوت ام كلثوم
- نسهر في الليل ونحرّك على النص رحانا
- حليل ذا يفتقر ما يأكل الا لهاليه
- يسهر بليـّـا هدف وإنْ نام يا ليلة الشوم
- ادعو له الله, عسى ياجيْ الفرج من دعانا
- عـِـيـْـنوا غريب الوطن حتى يعوّد لاهاليه
- ولا تخلـّـوه يبقى عند جهـّـال وغشوم
- على طريق الهدى نمشي مع من دعانا
ليست هناك تعليقات:
إرسال تعليق