نشيد يا راكبين على الذلايل

• يا راكبين على الذلايل من العيس
• قال الحوالي صار عندي هواجيس
• خلـّـتني العن بعضها والعن ابليس
• واعوّد اصبر لانّ ما لي سواها
• تقول يا شائق تجنـّـب عن الناس
• لو سلـّـموا بيدك جواهر مع الماس
• لولا كلام الناس ما كان شيء بأس
• خذها نصيحة ما تحصـّــل كماها
• فقلت ما اقدر لانّ هذي فضيحة
• كيف اقدر اوافق على ذا النصيحة
• واترك بني عمـّـي على كل صيحة
• في ديرة زينة وربـّـي سقاها
• قالت بني عمـّـك يحبـّـوك لا جيت
• ويقطعوا في ساقتك حين قفـّـيت
• والبعض منهم قال يا ليت يا ليت
• عنده عمى عيني ويأخذ عماها
• فقلت والاخوان ذولا في الدار
• أعطيتهم ما كان عندي من اسرار
• واطيعهم لو قالوا اجلس في النار
• رجال ما تقدر تدنـّـس لحاها
• قالت لي آثارك غشيم(ن) ومهبول
• تقول لي هرج(ن) ولا هو بمعقول
• ما تدري انّ الهرج ذا قلت منقول
• من يبدي اسراره لذولا سماها
• فقلت كـُـلّ(ن) (م)الجماعة تجمـّـل
• واذا مشيت امشي في الصف الاوّل
• ويقولوا اجلس بيننا لا تحوّل
• والعين لا غبتم تكثـّـر بكاها
• قالت لي آثارك مغفـّـل ومسكين
• ما ينخدع (م)الناس غير المجانين
• لو حصـّـلوا جسمك يقطـّـع بسكـّـين
• لقطـّـعوا كبدك وشربوا دماها
• فقلت ما لي ذنب لو يكرهوني
• مع انـّـي أفديهم بمقلة عيوني
• واطيعهم في كل ما ينصحوني
• ولو تكون الحرب دارت رحاها
• قالت لي أشهد ما تجيب الخطيـّـة
• صدّاق تمشي بين ربعك بنيـّـة
• لكنّ لو يحصل لهم سمّ حيـّـة
• قالوا لك اشرب شربة(ن) ما كماها
• فقلت كم مرّة يقولوا لي الشور
• واصبر على زلّاتهم واحمل الجور
• نظهر من الظلماء جميع(ن) الى النور
• ونأخذ الامداح من منتهاها
• قالت يقولوا (ف)النشائب تقدّم
• لكنّ لو ما حالف الحظ تندم
• وان زانت الاحوال قالوا لك انحم
• ما جبتها حتى حكمنا بناها
• فقلت يكفي ما في اليدّ حيلة
• يا ما اكثر الموضوع حول القبيلة
• والهرج يكفي عن كثيره قليله
• من يزرع النخلة بيدّه جناها
• قالت لو اتـْـكلـّـم من الصبح للـّـيل
• واعلـّـم الاجيال جيل(ن) وراء جيل
• ما ينقطع هرج(ن) سمعته كما السيل
• لكنـّـي اخشى لا تقل وش دهاها؟
• فقلت ما اصدّق اذا كنت ما ريت
• والمشكلة كيف اترك اهلي في البيت
• من حيث حلّ آبي وجدّي وحلـّـيت
• وارض(ن) حماها الله من الشرّ حماها
• قالت لي اهلك يفرحوا لو تفارق
• ما احد يفكـّـر ليش ما عاد شائق
• واذا تحبّ اجيب بعض الحقائق
• فابشر ولا تزعل ولو ما تباها
• فقلت انا لله وش ذا المصيبة؟
• كيف القريب اليوم يكره قريبه؟
• واهله يكلـّـمهم ولا احد يجيبه؟
• قلوبهم مثل الحصى في قساها
• قالت تمنـّـى ليّ والا اْتمنـّـى
• انـّـي مع ذولا بعيدين عنـّـا
• واسمع لغرّ(ن) زاع صوته وغنـّـى
• كيـّـه على قلبي وعنده دواها
• ضحـْـكت وقالت لي تكلـّـمت مرّات
• وقد لي اتكلـّـم معك سبع ساعات
• هيهات لو تسمع لما اقول هيهات
• ما كنت تتمنـّـى لروحك شقاها
• مشيت (ف)الدنيا وريت العجائب
• واخذت فكرة طيـّـبة (ع)الحبايب
• رمش العيون اللي يغطـّـي الحواجب
• فيه الخديعة والخيانة معاها
• فقلت انا تايه مع بعض الاحباب
• ريقه يداوي الجسم من قرصة الدّاب
• ولو يحطّ ايده مكان الوجع طاب
• في نظرته طعنة رهيف(ن) شباها
• مثل القمر بين النجوم الزواهي
• ضيـّـع قلوب(ن) عند ناس(ن) دواهي
• وانا بقيت امشي بدربي وساهي
• من حسن نوره تتلألأ سماها
• قالت صحيح أمـّـا الجمال اشتهر به
• هذه هديـّـة جات من عند ربـّـه
• كل العيون اللي تشوفه تحبـّـه
• لكن تصبـّـر, والله اقوى قواها
• يقتل بعينه من يشوفه وغشـّـاش
• ورميته ياجي بها فوق الانعاش
• مثل الذي يقتل غريمه برشـّـاش
• عيناه فيها الموت والا احداها
• فقلت كيف اعمل بتالي زماني
• فانتِ صدقتي في كثير المعاني
• وانا الذي وحدي بطرفه رماني
• أيـّـام ما اعرف صبحها من مساها
• قلبي غوي ما عاد يعرف طريقه
• والنار شبـّـت من يطفـّـيْ الحريقة
• شربت (م)الماء ذا بيروي حديقة
• لكنّ عيـّـا لا يطفـّـي حماها
• قالت قربنا نوصل الى النهاية
• فاحذر من الشيطان واهل الغواية
• واحذر تصدّق (م)الخلائق سوايه
• خذها نصيحة مثل عدّ الجناها
• فقبل كانوا يشترون النصايح
• ما هم سوى (ف)الناس, قايم وطايح
• ومن تركها صار (ف)الغـُـلـْـب رايح
• ويعيش ما يدري وش آخر مداها
• صحيح مرّت في حياتي تجارب
• مشيت (ف)الدنيا وريت الغرائب
• وريت عادات العرب والاجانب
• واذا كـُـتب للعبد خطوة مشاها
• وجدتهم جنسين: طيـّـب وبطـّـال
• ناس(ن) يحاول يتبع القيل والقال
• والبعض محسوب(ن) بميتين رجـّـال
• رجال نعرف طيبها من رداها
• قالت لي أمـّـا الشخص ذا قلت فيهْ خير
• إذا زهمته كأن (ف)اذنه مسامير
• يفرح بما جاءْ له وكم يحسد الغير
• واذا مسك حاجة بيدّه كلاها
• والثاني اللي ينقل اسرار ربعه
• رفاقته واجد وفي كل بقعة
• والحمد لله الذي شفت طبعه
• لا قلت له هرجة لغيرك حكاها
• قلت آه يا قلبي ويا صرم حالي
• ماذا جرى للنـّـاس وانا الحوالي
• عند الحقيقة لازم ابقى لحالي
• عن ناس ما اعرف وجهها من قفاها
• لكنّ من يقدر يداويْ الحماقة
• لو طحت في غدّار قطـّـاع ساقة
• أمـّـا من الاحباب والّا الرفاقة
• كيف اقبل الزلـّـة وعيني تراها؟
• قالت خذ الحلّ الذي ما مثيله
• حاول تموت وخلّ وقتك وجيله
• فالموت بياجيك والّا تجي له
• والروح وان طالت يجيها فناها
• وقل هلا بالموت يا مرحبا به
• مات النبي من قبل سيد الصحابة
• هذاك ذا ظلـّـت عليه السحابة
• روحه قبضها ربها واصطفاها
• فقلت انا لله وازيد (ف)الصوت
• والله سبع ايمان ما اخاف (م)الموت
• إلا انـّـي اخاف انتزي بئر برهوت
• ومن قتل نفسه بيدّه نزاها
• فكم مشينا في علوم(ن) عسيرة
• والذنب واجد والخطايا كثيرة
• في ديرتي هذي وفي كل ديرة
• والنار ما تحمل عظامي لظاها
• قالت صبرت عليك حتى انتهى الصبر
• والصبر من عاداته يودّي القبر
• كم يأخذ الانسان قهر(ن) وبالجبر
• ويحرق اعصابه وكبده شواها
• ما تدري انّ الله رحيم(ن) ورحمان
• في جنـّـة الفردوس روح(ن) وريحان
• ورحمته يرجيْ لها الانس والجان
• يغفر ويرحمها ويقبل رجاها
• واقفت وانا انظرها بعين(ن) حزينة
• والقلب له دقـّـات تسمع حنينه
• من كان مثلي فاطلب الله يعينه
• واقل عساها لا تعوّد عساها
• بقيت متعذّب وافكـّـر في امري
• صبرت وامـّـا اليوم يا قـُـلّ صبري
• لا هو نهار ابصر ولا ليل(ن) اسري
• واصبحت ما اعرف ليلها من ضحاها
• يا رب ترشدني لدرب الهداية
• لحيث متعذّب وزايد عناية
• ولا احد(ن) ظنـّـي تعذّب كمايه
• يا منبت الاشجار واسقى ظماها
• وصلاة ربي عدّ ما صلـّـوا الفرض
• وعداد ما ينبت من الزرع (ف)الارض
• شمالها وجنوبها طول والعرض
• على نبيّ(ن) والرسالة تلاها